Khatarknaak Dako Lambo Dakeet , Halwa Pori Baichta thaa

FAQ

Stories,Novels & Kahaniyan Share and Read All sort of Stories/Novels Online at bzupages.com

Advertisement Banner
.BZU. is offline

07-12-2011, 12:28 AM

خطرناک ڈاکو حلوہ پوریاں فروخت کر کے گزارہ کرتا تھا
Name: lambo daku halwa pori.jpg
Views: 159
Size: 112.5 KB

بڑے بوڑھے کہتے ہیں یہ سن اڑتالیس کے آخر کی بات ہے یعنی1948 کے آخر کی، جب حاجی صاحب نے لمبو ڈکیت پہلوان کو اردو بازار میں حلوہ پوری کا ٹھیہ لگا کر دیا تھا، پھر پوری زندگی اس نے پیچھے مڑ کر دیکھا نا ہی کبھی کسی کو لوٹا۔ البتہ دکانداری اس نے ڈکیتوں کے انداز سے ہی کی۔ جس کو چاہا سودا دیا اور جو دل کو نہ بھایا اسے مار بھگایا۔ شکل خوفناک تھی اور آواز ایسی گرجدار کہ جب غصے میں چلا کر بولتا تواجنبیوں کے پسینے چھوٹ جایا کرتے تھے مگر اس کی موت زیادہ شاندار نہ تھی۔ کراچی کے اردو بازار میں صابری نہاری والے سے تھوڑا آگے ایک دینی اشاعتی ادارے کا بہت بڑا کا مرکز ہے۔ یہ ادارہ قیام پاکستان کے وقت قائم تھا یا نہیں، یہ تو معلوم نہیں مگر1948میں جب ملکان سنگھ ڈاکو کا آٹھ رکنی گروہ یہاں پہنچا تو یہ ادارہ قائم تھا۔ صبح کا وقت تھا اور ہلکی ہلکی پھوار پڑ رہی تھی لہذا بازار میں آمد و رفت کم تھی۔ ادارے کے مالک حاجی صاحب اپنی کرسی پر آ کر بیٹھے ہی تھے کہ ملازم نے بتایا خطرناک شکلوں والے درجن بھر لوگ کافی دیر سے آپکا پو چھ رہے ہیں۔ یہ ادارہ غریبوں کی مدد کے لئے مشہور تھا لہذا مانگنے والوں کی آر جار لگی ہی رہتی تھی۔ ان دنوں پاکستان میں آئے لٹے پھٹے مہاجرین کی المناک کہانیاں ہر طرف بکھری پڑی تھیں اور خاص طو ر سے اس علاقے میں مہاجرین کی بڑی تعداد قیام پذیر تھی۔ ان لوگوں کو بھی ایسا ہی کوئی ضرورت مند سمجھ کر حاجی صاحب نے اندر بلوا لیا پھر کئی گھنٹے گزر گئے۔ ملازمین وقفے وقفے سے حاجی صاحب کے کمرے میں جھانکتے رہے، کبھی حاجی صاحب رورہے ہوتے تھے اور کبھی ڈاکو۔ پھر اگلے دن اردو بازار میں ایک ٹھیے کا اضافہ ہو گیا، یہیں سے لمبو دادا کی نئی زندگی کی شروعات ہوئی، جسے چند لوگ لمبو ڈکیت پہلوان کے نام سے بھی جانتے ہیں۔ لمبو ڈکیت ملکان سنگھ ڈاکو کے گروہ کا سب سے چھوٹا رکن تھا، یہ ملکان سنگھ کے پاس وادی چنبل میںکیسے پہنچا، لمبو نے کبھی کسی کو نہیں بتایا۔ بس اتنا پتہ چلا کہ جب لمبو، ملکان سنگھ کے پاس پہنچا تو سب سے کم عمر ہونے کے باعث کھانا پکانے کا کام اس کے سپرد کر دیا گیا تھا۔ اکثر وقت سفر میں ہونے کی وجہ سے ڈاکوئوں کا گروہ زیادہ تر حلوہ پوریاں ہی کھایا کرتا، جیسے ہی کھانے کا وقت ہوتا، فورا میدہ گوندھ کر تیل میں پوریاں تل لی جاتیں، ساتھ ہی حلوہ یا بھاجی بنا لی جاتی،اس طرح لمبو ڈکیت حلوہ پوری بنانے کا ماہر بن گیا۔ ملکان سنگھ تقسیم ہندوستان سے قبل وادی چنبل کا مشہور ترین ڈاکو تھا، اس کے گروہ کو پکڑنے کے لئے علاقے کے انگریز پولیس افسر نے جان لڑا رکھی تھی، جب پاکستان بننے کا اعلان ہوا تو ملکان سنگھ نے اپنے تمام ساتھیوں کو جمع کیا اور انہیں کہا کہ جس پر کوئی مقدمہ نہیں ہے، وہ تو اپنے حصے کا مال لے اور خاموشی سے کسی دوسری جگہ جا کر نئی زندگی کا آغاز کر لے کیوں کہ اب اس جنگل میں پولیس سے بچ کر زندہ رہنا ممکن نہیں رہا۔ جو لوگ پولیس کو مطلوب تھے، انہوں نے یہ طے کیا کہ مہاجرین کے قافلوں میں شامل ہو کر خاموشی سے پاکستان ہجرت کر جائیں اور وہاں ایک نئی زندگی کا آغاز کر دیں۔اس طرح ملکان سنگھ ڈاکو اور اس کے دیگر آٹھ ساتھی مہاجرین کے ایک قافلے میں شامل ہو کر پاکستان آنے میںکامیاب ہو گئے اور پھر رلتے کھلتے کراچی کے اردو بازار تک آپہنچے۔ لمبو اور حاجی صاحب نے اپنی زندگی بھر اس بارے میں زبان بند رکھی کہ آخر وہ کون سی وجہ تھی جس کے باعث ڈاکوئوں کے اس گروہ نے اسلام قبول کرنے کا فیصلہ کیا تھا۔ اس دن حاجی صاحب اور ڈاکو کئی گھنٹے تک کمرے میں بند کیا باتیں کر کے روتے رہے، اس بارے میں کسی کو کبھی معلوم نہ ہو سکا، اکثر لوگ آج تک یہ سمجھتے ہیں کہ لمبو دادا، جو اردو بازار میں حلوہ پوری بیچاکرتا تھا، ہندوستان سے ہجرت کر کے پاکستان آنے والا عام سا شخص تھا جو بنا شادی کئے یونہی حلوہ پوری فروخت کرتے کرتے مر گیا۔ چند لوگوں کو اس کی اصل کہانی معلوم تھی مگر لمبو ڈکیت پھر بھی انہیں غنچہ دے گیا، اس کی موت کے بعد لمبو کی زندگی کے چند مزید راز کھلے۔ اس کے ہاتھ میں جادو تھا، جب صبح اس کے ٹھیے پر پوریوں کی فروخت کھلتی تو خریداروں کی لائن لگی ہوتی تھی، اس کی آمدنی ٹھیک ٹھاک تھی مگر اس کے پاس ایک وقت میں دوسرا کرتا دکھائی نہ دیا۔ وہ ایک چھوٹی سی کُھٹلّی میں رہتا تھا، جہاں کسی دوسرے شخص کے لئے گھسنا ممکن ہی نہیں تھا۔ سردی گرمی،وہ اسی کھولی کے سامنے تھڑے پر بیٹھ کر گزارتا تھا۔ یہ کھولی بھی اس کی اپنی نہیں تھی بلکہ کہا جاتا ہے کہ اسے یہ کھولی حاجی صاحب نے عطا کی تھی، زندگی بھر بہت سے لوگوں کو یہ کھوج رہی کہ وہ اپنی کمائی کہاں کرتا ہے، کچھ لوگوں کا خیال تھا کہ لمبو داد جوا کھیلتا ہے، مگر وہ کبھی علاقے سے غائب ہی نہیں ہوا تو جوا کب کھیلا؟ ہر منہ میں ایک الگ کہانی تھی، کچھ شرارتی لڑکوںنے اس کی کھولی کی تلاشی بھی لی تھی مگر وہاں سے کسی کو ایک روپیہ نہ ملا، لمبو ڈکیت کی موت نے اس معمے کو حل کیا کہ اس کی کمائی کہاں جاتی تھی، پھر اس دن بہت سے ایسی آنکھیں بھی اشکبار ہوئیں جو لمبو دادا کی زندگی میں اس کی دوست نہیں تھیں۔
ملکان سنگھ اور اس کے ساتھیوں نے جس دن حاجی صاحب سے ملاقات کی تھی، اسی دن انہوں نے اسلام قبول کیا،حاجی صاحب کی حجامت بنانے والے خلیفہ نامی نائی کو بلوایا گیا اور پھر سب سے دیکھا کہ دکان کے باہر لائن سے بیٹھے ان میلے کچیلے ہٹے کٹے لوگوں کے پہلے سر مونڈھے گئے اور اس کے بعد ان کی مونچھیں بھی مونڈھ دی گئیں اور پھر ان ڈاکوئوں کی تمام تر ذمہ داری حاجی صاحب نے اٹھا لی۔ حاجی صاحب کے جو رشتہ دار اس بارے میں معلومات رکھتے ہیں، ان کا کہنا ہے کہ ہر ایک سے فردا فردا پوچھا گیا تھا کہ وہ کیا کام کر سکتا ہے۔ کچھ لوگ اندرون سندھ بھیج دئے گئے جہاں انہوں نے شادیاں کیں اور کھیتی باڑی میں مشغول ہو گئے، ان میں سے ایک بعد میں مشہور پہلوان بھی بنا مگر ان کا ذکر ہم ابھی نہیں کر رہے۔ لمبو ڈکیت کا جب نمبر آیا اور حاجی صاحب نے اس سے پوچھا کہ وہ کیا کرسکتا ہے تو اس نے مخصوص اجڈلہجے میں کہا’’ ہم کو صرف حلوہ پوری بنانا آتی ہے‘‘ پھر زندگی بھر اجڈ لہجہ اور حلوہ پوریاں اس کے ساتھ ہی رہیں۔ لمبو کو عام طو رپر اردو بازار میں لوگ لمبو داد کے نام سے جانتے تھے، اس کی زندگی کا ڈاکو والا پہلو اکثر لوگوں کے لئے اجنبی ہو گا اور بہت سے لوگوں کو شاید بہت برا بھی لگے مگر ہم ان سے پیشگی معافی مانگنے کے ساتھ اپنی بات پر قائم ہیں۔ لمبو ڈکیت کا قد چھ فٹ سے بھی نکلتا ہوا تھا اسی وجہ سے اس کا نام ہی لمبو پڑ گیا تھا، جنگلوں میں ڈاکوئوں کے ساتھ جو وقت اس نے بِِِتایا تھا، اس کے اثرات لمبو کے چہرے سے کبھی نہیں گئے، کرختگی کے باعث اجبنی لوگ اس سے بات کرنے سے گھبراتے تھے، وہ بس اپنے محلے کے لوگوںکے لئے لمبو داد بنا تھا، باہر سے آئے لوگوں اور اجنبیوں کے لئے وہ زندگی بھر ڈاکو ہی رہا، حد یہ تھی کہ وہ رات بھر اپنی کوٹھڑی کے باہر تھڑے پر بیٹھا رہتا تھا اور کسی اجبنی کو گلی میں داخلے کی اجازت نہ تھی، یہاں قریب ہی سوبھراج اسپتال قائم ہے، اسپتال میں تو اجنبیوں کی آمد و رفت ہوتی ہے، بس لمبو انہیں ڈانٹتا اور ان پر پھنکارتا رہتا، بہت سے لوگ ایسے واقعات کے اب بھی گواہ ہیں کہ کسی اجبنی نے اس کے ٹھیلے پر آ کر اس سے حلوہ پوری خریدنے کی کوشش کی اور جواب میں لمبو نے اسے کڑچھا دے مارا ہو۔ اس کے چند عجیب وغریب اصول تھے، ان میں سے ایک یہ بھی تھا کہ حلوہ پوری آدمی کو دیکھ کر دینی ہے، کسی کو وہ یہ کہہ کر بھگا دیا کرتا تھا کہ جائو تم کیا حلوہ پوری کھائو گے تمہیںتو حلوہ پوری کھانے کی تمیز ہی نہیں۔ کسی کو کہتا کہ ہمارا سودا تو محلے والوں کے لئے ہے ہم اجنبیوں کو سودا نہیں بیچا کرتے۔ ایک اصول یہ تھا کہ دس بجے کے بعد چاہے کچھ ہو جائے، کتنا ہی مال کیوں نہ بچاہو، وہ ٹھیہ بند کر دیا کرتا تھا، کئی بار ایسا ہوا کہ گاہک کھڑے تھے اور دس بج گئے، پھر کسی کو سودا نہیں ملا۔ تیسرا اصول یہ تھا کہ کوئی اس کے ٹھیلے سے کوئی چیز نہیں اٹھا سکتا تھا، کسی کو حلوہ پوری دینا ہوتی یا ترکاری، لمبو خود اپنے ہاتھوں سے دیا کرتا، ایسا کئی بار ہوا کہ کسی نے آگے بڑھ کو کوئی چیز اٹھائی اور لمبو داد نے پوریاں تلنے والا کڑچھا اسے دے مارا۔ لمبو ڈکیت سے تین چیزوں کو مکمل امان حاصل تھا، ان میں سے ایک گلی کے بچے تھے، لمبے تڑنگے لمبو داد ا کو گلی کے بچوںنے ہمیشہ کھلونا بنائے رکھا، اکثر ایسا ہوتا کہ بچے اسے پتھر مار کر بھاگ جاتے، کوئی اس کی چپلیں چھپا دیتا اور کوئی آوازے کستا، مگر ایسا کبھی بھی نہیں ہوا کہ لمبو نے کبھی کسی بچے کو مارا ہو، ہاں وہ چیختا دھاڑتا بچوں کے پیچھے بھاگتا اور بس! دوسرے نمبر پر گلی کے کتے لمبو دادا ڈکیت کے غضب سے محفوظ تھے اور تیسرے نمبر پر پرندے اس عجیب و غریب ڈاکو حلوائی کی محبت کے مزے لوٹا کرتے تھے۔ بظاہر کرخت اور بد تمیز قسم کا دیو زاد حلوائی اندر سے ایک ٹوٹا پھوٹا شکستہ حال انسان تھا، اپنی پوشیدہ نیکیوں کے باعث اس کی موت اچھی ہونی چاہیے تھے مگر افسوس کہ ایسا نہیں ہو سکا، یہ ایک ہولناک واقعہ اور دردناک موت تھی جس کی حقیقت چند لوگ ہی جانتے ہیں، اکثر لوگوں کا خیال ہے کہ دس برس قبل پیش آنے والا وہ واقعہ ایک حادثہ تھا مگر یہ بات درست نہیں۔(جاری ہے

توبہ کے بعد لمبو ڈکیت بچوں کے ہاتھوں مارا گیا
Name: lambo dacait.jpg
Views: 39
Size: 94.8 KB

Name: lambo dacait.jpg
Views: 39
Size: 94.8 KB

وہ سردیوں کے دن تھے، سن دو ہزار کے اختتام میں ہلکی بارش کے بعد کراچی میں معمول سے کچھ زیادہ ہی ٹھنڈ تھی اسی لئے ہر کوئی سرے شام ہی گھر میں بند ہو گیا تھا، ایسی ٹھنڈ میں اردو بازار کی سوبھراج والی گلی میں چند بچوں کی ایک ٹولی سر جوڑے بیٹھی تھی، پھر ان میں سے دو بچے دائیں بائیں دیکھتے آہستگی سے ایک کھنڈر نما عمارت کی طرف بڑھے، سیڑھیوں کے ساتھ بنی کھولی کے ٹوٹے اور آدھ کھلے دروازے کو زور لگا کر تھوڑا اور کھولا اور کوئی چیز اندر اچھال کر بھاگ کھڑے ہوئے۔ یہ بچوں کا مشغلہ تھا، جب بھی وہ ایسا کرتے تو در عمل میں اس چھوٹی سی کوٹھڑی میں ایک زلزلہ سا بپا ہو جاتا اور پھر چھ فٹا لمبو ڈکیت دادا اپنی قبر نما کھولی سے باہر نکل آتا، اس وقت لمبو کا جلال دیکھنے والا ہوتا تھا، ادھیڑ عمری میں اس نے اپنی مونچھیں کچھ بڑھا کر تلواری بنا لیا تھا، آنکھیں پہلے ہی خون سے بھری معلوم ہوتی تھیںمگر غصے کے وقت مزید انگارہ ہوجایاکرتی تھیں، جب کبھی بچے اسے نیند میں ستایا کرتے تھے تو وہ جلدی میں بغیر قمیص پہنے ہی باہر نکل آتا اور ہاتھ میں کبھی پوریاںتلنے والا کڑچھا ہوتا یا پھر برف توڑنے والا سوّا۔ تنگ کرنے والوں کے آباو اجداد کو وہ باہر نکل کر اپنی اونچی آواز میں ایسی ایسی سناتا تھا کہ بس! بچوں کے لئے یہ ایک تماشا تھا کیونکہ سب کو یہ معلوم تھا کہ لمبو دادا کبھی کسی بچے کو نہیں مارتا۔ مگر لمبو کی زندگی کے آخری دن بچے سب کچھ کرنے کے بعد بھی اسی حسرت میںرہے کہ لمبو دادا باہر نکلے اور وہ تماشا دیکھیں مگر نہ تو لمبو باہر نکلا اور نا ہی تماشا لگا۔ وہ بچوں کو شیطان کہا کرتا تھا اور انہی شیطانوں نے اس دن اسے جلا کر مار ڈالا ۔ایک ایسے ہی بھیگے ہوئے ٹھنڈے موسم کی صبح، وادی چنبل کے ڈاکو لمبو دادا نے اسلام قبول کر کے نئی زندگی کی شروعات کی تھی اور ایسے ہی موسم کی ایک اداس شام اس کی زندگی کی بھی شام ہو گئی۔ ہم نے کل یہ بتایا تھا کہ لمبو ڈکیت حلوائی کے غیض و غضب سے تین چیزوں کو امان تھی،ان میںپہلے نمبر پر بچے تھے۔ لمبو شکل و صورت سے ہی چھٹا ہوا بدمعاش لگتا تھا، پھراس کا غصہ اور مار دھاڑ بھی سب کے سامنے تھا۔ اردو بازار کے لوگوں نے لمبو کے ساتھ ہاتھا پائی کرتے صرف ایک ہی آدمی کو دیکھا تھا، کسی کو ٹھیک سے یہ تو معلوم نہیں کہ وہ کون تھا، کچھ لوگوں کو خیال ہے کہ وہ کوئی پولسیا تھا، اس نے لمبو کے ٹھیئے سے حلوہ پوری کھا کر پوری رقم ادا کرنے میںکچھ آنا کانی کی تھی، لمبو نے حسب معمول اسے کڑچھا دے مارا اور اگلے لمحے ہی اس نے لمبو ڈکیت عرف دادا پر ہاتھ اٹھا دیا، بس پھر کیا تھا، لمبو کے اندر کا سویا ہوا ڈاکو ایک انگڑائی لے کر جاگ اٹھا، کہتے ہیں کہ اگر لوگ نہ چھڑاتے تو اس دن لمبو کے ہاتھ سے ایک قتل ہو کر رہتا۔ بس لمبو کی زندگی کا یہ ایک ہی واقعہ ہے جس میںکسی نے اس پر ہاتھ اٹھا دیا تھا ورنہ کوئی اس سے الجھنے کی ہمت ہی نہیں کرتا تھا۔ ہاں بچوں کی اور بات تھی، وہ اسے نچائے رکھتے تھے، اردو بازار کے کچھ لوگوں کا کہنا ہے کہ گلی کے بہت سے لوگوںنے لمبو سے اپنا بدلہ بچوں کے ذریعے لیا تھا، جس کو اس سے کوئی شکایت ہوتی، وہ خود تو کچھ کرنے کی ہمت نہ پاتا تھا مگر بچوں کو اس کے پیچھے لگا دیا کرتا،کوئی اسے پتھر مار کر بھاگ جاتا، کوئی اس کے پانی کا کنستر الٹ دیتا اور کوئی اس کے کمرے میں پٹاخے پھینک جاتا، جس کو قریب جانے کی ہمت نہیں ہوتی وہ دور کھڑا اس پر آوازے کستا رہتا، جواب میں لمبو کا منہ بھی مسلسل چلتا مگر اس نے کبھی کسی بچے پر ہاتھ نہیں اٹھایا، یہ ایک حیرت انگیز بات تھی، دینی ادارے والے حاجی صاحب جنہوں نے لمبو کو مسلمان کرنے کے بعد اردو بازار میں حلوہ پوری کا ٹھیا لگا کر دیا تھا، ان کے کچھ عزیزوں کا کہنا ہے کہ لمبو ڈکیت در اصل زندگی بھر بچہ ہی رہا، جب وہ ملکان سنگھ ڈاکو کے گروہ میں شامل تھا، تب بھی بچہ تھا اور پاکستان آنے کے بعد نئی زندگی میں بھی وہ بچہ ہی رہا۔شاید وہ اپنے بچوں میں اپنے اس بچپن کو ڈھونڈتا رہتا تھا جو ملکان سنگھ کے گروہ میں کھو گیا تھا۔ مگر ہمیں لمبو کی زندگی کے کچھ ایسے واقعات کا علم بھی ہوا جو ایک اور پہلو کو سامنے لاتے ہیں۔ ان کا ذکرہم اگلی چند سطروں میںکریں گے مگر اس سے قبل یہ بتا دیں کہ لمبو حلوائی کبھی رات کو سوتا نہیں تھا، اس کے قریب رہنے والے لوگوں کا کہنا ہے کہ وادی چنبل میں جب وہ ملکان سنگھ ڈاکو کے گروہ میںشامل تھا تو اسی وقت سے اسے جگ راتے کی عادت پڑ گئی تھی کیونکہ رات کو یا تو ڈاکو کہیں ڈاکہ ڈال رہے ہوتے تھے یا پھر جنگل میں اپنے ٹھکانے کا پہرہ دے رہے ہوتے تھے، بس وہیں لمبو کی یہ عادت اس قدر پختہ ہوئی کہ وہ پھر زندگی بھر رات کو سو نہ سکا۔ رات کو جب گلیاں سنسان ہونے لگتیں تو لمبو ڈکیت کا دن ہو جاتا، وہ اپنی قبر سے نمودار ہوتا اور کھولی کے سامنے بنے تھڑے پر بیٹھ جاتا پھر رات بھر وہ اس تھڑے پر بیٹھ کر آنے جانے والوں پر نظر رکھتا تھا، کبھی کسی کو پھٹکار کر بھگا دیتا اور کبھی کسی چوکیدار سے بات کر لیتا مگر کوئی اس کا دوست نہ تھا۔ یہ سلسلہ صبح چار بجے تک چلتا، اسکے بعد ٹھیے کا کام شروع ہو جاتا۔ اس کے اصولوں میں سے ایک یہ بھی تھا کہ ترکاری اور حلوہ تاروں کی چھائوں میں بنے گا۔ رات کو جاگنے کی وجہ سے وہ دن کو اور کبھی شام کو بھی سویا کرتا تھا اور بچوںکو بھی اس وقت کا انتظار رہتا۔اس کی زندگی کے آخری دن بھی یہی ہوا، سردی کی شدت کی وجہ سے گلیاں سنسان تھیں اور بچوں کو کچھ اور نہیں ملا تو انہوں نے لمبو ڈکیت دادا کو ستانے کی ٹھان لی۔ یہ سن دو ہزار کے دسمبر کا شاید آخری جمعہ تھا، بچوں نے لمبو کو سوتا دیکھا تو ایک لڑکا کہیں سے’’ انار‘‘ نامی پٹاخہ بم لے آیا، ان کا خیال تھا کہ اسے آگ لگا کر لمبو دادا کی کوٹھڑی میں پھینک دیں گے اور جب بم پھٹے گا تو وہ شور مچاتا باہر نکل آئے گا اور خوب تماشا لگے گا۔ لمبو دادا اس وقت سو رہا تھا اور خراٹوں کی آوازیں باہر تک آرہی تھیں، مگر بد قسمتی سے وہ بم پھٹ نہ سکا مگر اس کی چنگاریوں نے کوٹھڑی میں پڑی رضائی ، گدے اور دیگر کپڑوں کو آگ دکھا دی، کچھ دیر بعد کوٹھڑی میں چیخ و پکار ہوئی، تماشا بھی لگا مگر وہ لمبو کی زندگی کا آخری شو تھا جو بچوں نے گھبراہٹ میں دیکھا۔ جب تک لوگوں کو خبر ہوئی اور کوٹھڑی کی آگ بھجائی گئی، چھ فٹ کے لمبو دادا کی جگہ جھلسے ہوئے گوشت کی ایک پوٹلی پڑی تھی، لمبو کی کوٹھڑی میں تیل کے وہ کنستر بھی پڑے تھے جن میں پوریاں تلی جاتی تھیں، اسی تیل نے جب آگ پکڑی تو لمبو بھی اسی میں جل بھن گیا۔ اردو بازار کے بہت سے لوگ کہتے ہیں کہ جس دبدبے سے اس نے زندگی گزاری، اس کی موت اتنی شاندار نہ تھی۔ مگر موت کے بعد لمبو ڈکیت کی زندگی کا ایک اور ایسا شاندار پہلو سامنے آیا، جس نے بہت سے سروں کو شرم سے جھکا دیا۔ لمبو ڈکیت نے زندگی میں کسی کو دوست تو بنایا نہ تھا، البتہ لوگ اس کی پر اسرار زندگی پر شکوک کا اظہار کرتے رہتے تھے،عموماایسا ہوتا تھا کہ لمبو پورا دن کے لئے غائب ہو جاتا اور ایک بار تو پورے ایک ماہ کے لئے بھی غائب ہو گیا تھا، اس کی زندگی کے اس راز سے صرف تین شخص واقف تھے مگر موت کے بعد کافی لوگوں پر یہ راز آشکار ہو گیا۔ لمبو ڈکیت نے نئی زندگی ضرور شروع کی تھی مگر وہ اپنے آبائی علاقے کو نہیںبھولا تھا۔ جب کسک زیادہ بڑھی تو اس نے خاموشی سے اپنا پاسپورٹ بنوایا اور بھارت چلا گیا جہاں سے اس کی واپسی ایک ماہ بعد ہوئی، اس دوران لوگ یہ سمجھتے رہے تھے کہ لمبو کہیںچلا گیا ہے۔ لمبو کا دنیا میں کوئی رشتہ دار نہیں تھا، یا اگر تھا تو اسے اس بارے میںکچھ علم نہیںتھا، بھارت میں جا کر وہ کس سے ملا، اس بارے میں کسی کو علم نہیں۔ اس کے علاوہ لمبو کی زندگی کا ایک پراسرار راز یہ تھا کہ وہ اپنی دولت کہاںکرتا ہے، جب اس کی کھولی میں آگ لگی تھی تو کچھ ایسے لوگ بھی تھے جو لمبو کی میت کو باہر نکال کر اس امید پر کھولی کی راکھ کریدتے رہے تھے کہ نوٹوں کے بدلے جو سونے کے بسکٹ لمبو جمع کر رہا تھا، ان کے ہاتھ لگ جائیں۔ یہ ہم نے کل بتایا تھا کہ لمبو کے ہاتھ میں جادو تھا لہذا اس کے ٹھیلے پر لائن لگی رہتی تھی مگر لمبو کو اپنی کمائی کبھی خرچ کرتے کسی نے نہیں دیکھا۔ لوگوں کا خیال تھا کہ وہ پیسے کا بھوکا ہے، تنہا آدمی ہے اس لئے رقم جوڑ رہا ہے، لوگ یہ بھی کہتے تھے کہ اس نے کھولی میں نوٹوں کی گڈیاں چھپا رکھی ہیںاور انہی کی حٖفاظت کے لئے ہر رات کھولی کے سامنے بیٹھا رہتا ہے، یہ بھی کہا جاتا تھا کہ لمبو گھاک آدمی ہے نوٹ نہیں رکھتا بلکہ ان کے بدلے سونے کے بسکٹ خرید لیتا ہے اور کھولی میں کہیں نہ کہیںدبا دیتا ہے۔ لمبو داداکی زندگی میںتو کسی کو یہ جرات نہ ہوئی کہ وہ اس دولت کی طرف آنکھ اٹھاتا مگر اس کے مرتے ہی لوگوں نے کھولی کا ہر حصہ ادھیڑ ڈالا مگر نہ کسی کو دولت ملنا تھی اور نا ملی۔لمبو دادا تنہا آدمی تھا جس کا نہ کوئی پیچھے تھا اور نا آگے، محلے والوں نے بچوں کی شرارت کو حادثہ قرار دے کر لمبو کو سفید چادروں میں لپیٹا اور میوہ شاہ کے قبرستان میں گاڑ آئے۔ سبھی کا خیال تھا کہ لمبو ڈکیت عرف دادا کی کہانی یہاں ختم ہو گئی اور مہینہ ختم ہوتے ہوتے لوگ لمبو کو بھولنے بھی لگے مگر اصل کہانی اب شروع ہوئی تھی۔ لمبو حلوائی کی موت کو سوا مہینہ گزرا تو اسے ڈھونڈنے اردو بازار پہنچنے والوں کی قطار لگنا شروع ہو گئی۔ کبھی کوئی لنگڑا رشید بھائی کو ڈھونڈتا آ نکلتا اور جب وہ حال حلیہ بتاتا تو لوگ سمجھتے کہ لمبو دادا کو ڈھونڈ رہا ہے، کبھی کوئی بڑھیا اس کا پتہ پوچھتے آ نکلتی، جب انہیں بتایا جاتا کہ لمبو حلوائی جل کر مر چکا ہے تو وہ دل تھام کر بیٹھ جاتے، لمبو کی موت کے کئی ماہ بعد تک ایسے پچاسیوں لوگ اسے ڈھونڈتے ہوئے اردو بازار آتے رہے۔ لمبو دادا جو وادی چنبل کے ملکان سنگھ ڈاکو کے گروہ کا رکن تھا، اور جس کی آنکھوں سے خون ٹپکتا تھا اور لوگ اسے چہرے سے ہی چھٹا ہوابد معاش قرار دیتے تھے، وہ لمبو جو اپنی بد مزاجی اور مار دھاڑ کے لئے مشہور تھا، ان سب لنگڑوں، غریبوں اور ضعیفوں کو پال رہا تھا، لمبو کے لئے دھاڑتے مارتے اجنبی لوگوں کو دیکھ کر اردو بازار کی سوبھراج اسپتال والی گلی کے لوگوں کو پتہ چلا کہ لمبو کی کمائی کہاںجاتی تھی اور اس کی کوٹھڑی سے سونے کے بسکٹ کیوں نہیں ملے۔ہاں دو سوالوں کے جواب اب تک کسی کو نہیں مل سکے، ایک تو یہ کہ لمبو بعض اوقات رات کو روتا کیوں تھا، کئی لوگوں نے یہ دیکھا کہ رات کے سناٹے میں لمبو آسمان کی طرف سر اٹھا کر اپنی بھدی آواز میں کچھ گنگناتا اور روتا رہتا تھا، وجہ پوچھنے کی ہمت کسی نے نہیں کی اور نا خود اس نے کبھی کسی کو بتایا، دوسری بات لمبو کا رویہ تھا، وہ اپنی پوری کمائی غریبوں پر زندگی بھر لٹاتا رہا مگر محلے میں وہ ڈان بنا رہا، یہ راز کسی کو سمجھ نہ آسکا۔ اور ہاں لمبو کا حلوہ پوری کا ٹھیہ اس کی موت کے بعد بھی بند نہیں ہوسکا۔( جاری ہے

__________________

(¯`v´¯)
`*.¸.*`
¸.*´¸.*´¨) ¸.*´¨)
(¸.*´ (¸.Bzu Forum

Don't cry because it's over, smile because it happened

.BZU.

Your Friendly Admin
Innocent Baby
BSIT Professional

Join Date: Sep 2007

Location: near Govt College of Science Multan Pakistan

Posts: 9,684

Thanks: 2,338

Thanked 2,223 Times in 1,816 Posts

Contact Number: Removed

Program / Discipline: BSIT

Class Roll Number: 07-15

Show Printable Version

Email this Page

Thread Tools	Search this Thread
Show Printable Version Email this Page	Search this Thread: Advanced Search
Display Modes	Rate This Thread
Linear Mode Switch to Hybrid Mode Switch to Threaded Mode	Rate This Thread:

Similar Threads
Thread	Thread Starter	Forum	Replies	Last Post
Maaon ki dua pori hue	Salman Mushtaq	Youtube Videos/Clips etc	0	13-08-2011 09:40 PM
Mainne Tujhe Kabhii Kuchh Kahaa Thaa ; Yeh Vaada Raha (1982)	.BZU.	Indian Movie's Audio Songs	1	13-03-2011 01:51 PM
yaar thaa gul_zaar thaa baad-e-sabaa thii mai.n na thaa	viky	Urdu Poetry	1	02-03-2011 06:42 PM
Nana patekar funny, hahahha... Multan ka Halwa ho tum..	.BZU.	Funny/Comedy	0	29-11-2009 06:18 AM

Currently Active Users Viewing This Thread: 1 (0 members and 1 guests)